今晚英超壓軸尾場上演「紅藍大戰」，由利物浦主場火併曼城。今仗係「藍月亮」於財務違規案被判罪成後首場賽事，難免影響軍心，利物浦為免太早失波陷於被動，近期轉踢守勢波，尤其初段零舍保守，半場和不妨再追。（Now 621、622及611周日晚11時30分直播）文:法達斯維
曼城原本順風順水，開咧聯賽5連勝，點知喺早前國際賽期間，被判過百項財務違規罪成，隨時會被罰款甚至扣分，雖然曼城堅稱無罪並提出上訴，但忽然從天堂打落地獄，球員能否繼續以平常心比賽，頓成疑問。禍不單行係王牌艾寧夏蘭特，為挪威出戰歐國聯時拉傷肌肉，今仗上陣成疑，若果缺少呢名開季6場入7粒嘅射手，「藍月亮」攻力勢必大打折扣。
紅軍箭頭傷患困擾
另邊廂，坐擁地利嘅利物浦，新帥伊拉奧拿上任後主打高位逼搶戰術，但由於眾將仍未適應，季初頻頻失波，佢亦向現實低頭，先鞏固防守，單計聯賽近3仗保持清白之身，而各項賽事近4仗有3次半場打和，可見佢哋初段分外保守。加上「紅軍」前線嘅加普、阿歷山大伊沙克喺國際賽負傷而回，就算趕及披甲，亦未必有十足狀態，今場強強對碰預計大家都小心為上，半場和值得捧場。