今晚歐聯有場入球騷，就係土超班霸加拉塔沙雷主場迎戰西甲「一哥」巴塞隆拿。加拉塔沙雷鋒線星味十足，但係識攻唔識守，巴塞攻力強不在話下，今場未踢都知多數開大比數，搞到大細中位數最低消費要4.5球，留意到巴塞近7場半場全開2球或以上，轉玩中位數1.5/2球半場大最明智。（Now 639周三凌晨3時直播）文:邪神
加拉有前冇後易出事
加拉塔沙雷擁有域陀奧森漢、利萊辛尼同根度簡3位一線球星，攻力唔會差，但弊在頭重尾輕，防線多甩漏，喺土超橫掃冇問題，但出到歐洲賽就難有作為，佢哋上屆16強出局，今屆首輪作客士砵亭輸1比3，今場對住實力頂級嘅巴塞，估計前面入埋唔夠後面輸。
巴塞上場西甲3比0贏基達菲，連同歐聯首仗大勝飛燕諾5比1，開季各項賽事9連勝，入39球失8球，勒都勒唔住，不過由於入波最多、累積14球3助攻嘅拉芬夏比洛尼受傷缺陣，因此4.5球入球大確實有一定風險，不過佢哋主攻踢法不變，特別係上半場，往往至少先入兩粒打底，近期直落7場開半場大，所以今場策略好簡單，就係先玩半場大，再睇即場走勢隨機應變。